Meistaraflokkur kvenna vann í kvöld afar sannfærandi sigur á Tindastólsstúlkum í fyrsta leik sínum í 1. deild kvenna, en lokatölur urðu 6-0.

Skagastúlkur höfðu góða stjórn á leiknum, spiluðu af góðum krafti og sköpuðu sér töluvert af færum en það vantaði aðeins upp á yfirvegun fyrir framan markið.

Maren Leósdóttir skoraði fyrsta markið á sautjándu mínútu og Heiðrún Sara Guðmundsdóttir bætti öðru við rétt fyrir hálfleik.

Maren bætti við öðru marki á 63. mínútu og fullkomnaði þrennuna á 75. mínútu. Skagastúlkur voru þó ekki hættar, Bryndís Rún Þórólfsdóttir bætti við marki á 77. mínútu en síðasta markið skoraði Erla Karitas Jóhannesdóttir, í sínum fyrsta meistaraflokksleik í Íslandsmóti, en það kom á 81. mínútu.

Það þarf ekki að koma neinum mikið á óvart en Maren Leósdóttir var valin maður leiksins og hlaut hún að launum 10.000 kr. gjafabréf frá veitingastaðnum Uno.

Næsti leikur stelpnanna verður 19. maí þegar þær heimsækja ÍR.