Á morgun, laugardaginn 27. maí kl. 14:00, taka okkar stelpur i meistaraflokki kvenna á móti HK/Víkingi á Norðurálsvellinum í þriðju umferð 1. deildarinnar.

Það er ljóst að um hörkuleik verður að ræða en þetta eru þau tvö lið sem fyrirliðar og þjálfarar spáðu efstu tveimur sætunum í deildinni í sumar.

Síðustu leikir milli liðanna verða nú seint sagðir miklir markaleikir, en aðeins hefur verið skorað eitt mark í síðustu þremur viðureignum. En það var einmitt sigurmark Bergdísar Fanneyjar Einarsdóttur í Faxaflóamótinu nú í janúar.

Við hvetjum alla sem vettlingi geta valdið til þess að skella sér á völlinn og styðja við stelpurnar. Að vanda verður boðið upp á fríar kaffiveitingar í hálfleik en þá verða einnig seldir happdrættismiðar.

Börnum stendur til boða að fá að leiða liðin inn á völlinn fyrir leik, en þau sem hafa áhuga á að taka þátt í því þurfa að mæta við vallarhúsið kl. 13:40 til að fá treyjur.