Haustið er ekki allra. En við sem skoppum í körfunni fílum haustið, því þá fer karfan af stað af fullum þunga. Meistaraflokkur karla hefur leik í dag og einnig er fyrsta mótið hjá yngriflokkum okkar í gangi þessa helgina.
Á síðustu leiktíð lék meistaraflokkur karla hjá okkur í 1. deild og var árangurinn, ja – hvað er hægt að segja... undir væntingum? Já orðum það bara þannig.
Það sem sagt gekk á ýmsu, erlendur leikmaður okkar meiddist og þurfti frá að hverfa, annar kom í staðinn, þurfti að fara aðeins heim aftur, kom til baka og fór svo alveg aftur áður en tímabilið var búið. Stundum mættum við með fullmannað lið og einhverjir voru fyrir utan hóp, þá sjaldan það gerðist, stundum rétt náðum við í lið, jafnvel ekki fullum hóp o.s.frv.. En við lærðum mikið á síðasta vetri og komum því reynslunni ríkari til keppni í ár.
Þannig að þegar meistaraflokkstímabilið síðasta var allt og niðurstaðan lág fyrir var ljóst að félagið þurfti að fara í ítarlega innri skoðun. Við vorum á krossgötum. Ný stjórn á gömlum grunni tók til starfa á vormánuðum, haldinn var opinn félagsfundur hjá félaginu í byrjun sumars (sem reyndar aldrei kom) þar sem formaður KKÍ var fundarstjóri og voru málefni félagsins rædd opinskátt og ýmsum möguleikum um framhaldið kastað fram. Gríðarlega góður fundur og þökkum við öllum sem komu og sýndu félaginu virðingu í verki – engum sem var á þessum fundi var eða er sama um félagið. Það þykir okkur væntu um. Sú ákvörðun var svo tekin, eftir að búið var að melta þennan fund og fara yfir flestar ef ekki allar hliðar, að senda meistaraflokk karla til keppni í 2. deild karla tímabilið 2018/2019. Það tímabil hefst einmitt í dag. Margir af eldri leikmönnum liðsins hafa nú lagt skóna á hilluna og ljóst að kynslóðaskipti, sem hafa verið yfirvofandi í nokkurn tíma, eru næsta mál á dagskrá – aðeins fyrr en áætlað var. En það er bara svoleiðis. Nú á haustdögum hafa fimm efnilegir leikmenn bæst í hópinn þannig að við höldum nú inn í Íslandsmótið með ungt og spennandi lið í bland við nokkra eldri og reyndari leikmenn. Hópurinn okkar er nú skipaður mjög frambærilegum leikmönnum, í góðu formi sem eru hungraðir í að spila, þetta styrkir okkar hóp verulega og býr til samkeppni um að komast í liðið. Við stefnum á að hafa nánari kynningu á leikamannahópnum von bráðar. Við viljum nota tækifærið og þakka þeim leikmönnum, sem nú eru horfnir á braut, kærlega fyrir þeirra framlag til félagsins!
Það hafa ekki bara verið gerðar stjórnar- og leikmannabreytingar, þjálfaraskipti hafa einnig átt sér stað hjá meistaraflokki okkar þar sem þjálfarar síðasta tímabils ákváðu í lok síðasta tímabils að halda ekki áfram með liðið. Við þökkum þeim kærlega fyrir sitt framlag síðustu tímabil. Nýji maðurinn í brúnni hjá okkur núna er 37 ára, kemur til okkar alla leið frá Bandaríkjunum en hann mun auk þess að þjálfa liðið, reyna að vera eitthvað með inná vellinum einnig. Og eins og það sé ekki nóg, þá sér hann einnig um þjálfun elstu yngriflokka okkar. Við bindum miklar vonir við hann sem þjálfara og það sem við höfum séð til hans og æfinga hans hingað til, lofar virkilega góðu. Honum til aðstoðar í meistaraflokki verður einnig nýr liðsstjóri sem er að stilla prógramið sitt við okkar.
Yngriflokkar okkar halda áfram að blómstra, við náðum frábærum árangri körfuboltalega séð á mörgum stöðum síðasta vetur, eigum þar virkilega frambærileg lið sem gaman verður að fylgast með í framtíðinni. Yngriflokkastarf snýst ekki bara um að ná körfuboltalegum árangri þannig að við í Körfuknattleiksfélagi ÍA reynum sem best við getum að stuðla að því að starfið okkar nái líka árangri félgaslega séð. Við leggjum mikið upp úr því að iðkendum okkar líði vel, vilji halda sem lengst áfram í íþróttinni og hvort sem viðkomandi verður landsliðsmaður, atvinnumaður, meistaraflokksmaður eða bara félagsmaður þá erum við sem stöndum að félaginu sáttir. Við höfum unnið eftir þessum gildum síðustu ár og ætlum að halda því áfram og reyna að efla þar enn frekar. Það eru mörg mót framundan hjá yngriflokkunum í vetur, fyrsta keppnisferðin erlendis hjá yngriflokkum okkar í langan tíma er á dagskrá sumarið 2019 með tilheyrandi spennu og eftirvæntingu þannig að það eru bara bjartir tímar framundan.
Þannig að það eru allir spenntir og tilbúnir að taka nýju tímabili fagnandi hjá okkur í Körfuknattleiksfélagi ÍA. Nú er það bara áfram og upp, horfum fram á veginn og áfram ÍA, alltaf, allstaðar!
Baráttukveðjur
Stjórn Körfuknattleiksfélags ÍA ... See more
