76. Ársþing ÍA var haldið í Tónbergi, sal Tónlistarskóla Akraness fyrr í kvöld en þinginu hafði verið frestað sökum samkomubanns.

Þingforseti var kjörinn Hörður Ó. Helgason. Ársskýrsla framkvæmdastjórnar ÍA 2019 var lögð fram af formanni ÍA, Marellu Steinsdóttur, og má skoða hana hér.

Þær breytingar urðu á stjórn ÍA að Dýrfinna Torfadóttir, Tjörvi Guðjónsson og Svava Huld Þórðardóttir gáfu ekki kost á sér til áframhaldandi stjórnarsetu og Hallbera Jóhannesdóttir gaf ekki kost á sér til setu í varastjórn. Þeim eru öllum færðar bestu þakkir fyrir óeigingjarnt starf fyrir ÍA um árabil. Gísli Karlsson var valinn í aðalstjórn en hann hafði áður verið í varastjórn en auk hans taka Hrönn Ríkharðsdóttir og Líf Lárusdóttir sæti í aðalstjórn. Ný í varastjórn voru kjörin þau Erla Lárusdóttir og Trausti Gylfason og eru þau boðin hjartanlega velkomin til starfa. Marella Steinsdóttir var endurkjörinn formaður og Hörður Ó Helgason, varaformaður.

Íþróttabandalag Akraness veitti tólf einstaklingum Bandalagsmerki ÍA fyrir vel unnin störf fyrir íþróttahreyfinguna á Akranesi. Þau sem heiðruð voru eru eftirtalin: Ása Hólmarsdóttir, Brandur Sigurjónsson, Brynjar Sigurðsson, Haraldur Ingólfsson, Hjördís Hjartardóttir, Ingunn Ríkharðsdóttir, Ólafur Ingi Guðmundsson, Óskar Arnórsson, Steindóra Steinsdóttir, Svava Hrund Guðjónsdóttir, Þóranna Halldórsdóttir og Þórður Elíasson.

Þá tók annar varaforseti ÍSÍ, Hafsteinn Pálsson, til máls og bar fyrir kveðjur stjórnar ÍSÍ. Hann veitti ÍA viðurkenningu sem Fyrirmyndarhérað ÍSÍ en sú viðurkenning er veitt fyrir fyrirmyndarstarf íþróttahéraða.

Auður Inga Þorsteinsdóttir framkvæmdastjóri UMFÍ tók til máls og bauð ÍA velkomið í UMFÍ fjölskylduna. Hún tók fram að það að fá ÍA í lið með UMFÍ verði til framdráttar fyrir báða aðila. Auður Inga ræddi um mikilvægi íþróttastarfs fyrir samfélagið og þá einstakinga sem taka þátt í skipulegu íþróttastarfi. Í því sambandi nefndi hún m.a. mikilvægi þess forvarnastarfs sem íþróttahreyfingin vinnur.

Sævar Freyr Þráinsson, bæjarstjóri Akraness bar fyrir kveðju bæjarstjórnar og fór m.a. yfir framkvæmdir á íþróttamannvirkjum bæjarins  sem nú standa yfir og það sem væri framundan í þeim efnum. Sævar Freyr ræddi einnig um samstarf íþróttahreyfingarinnar og sveitarfélagsins varðandi greiningu á stöðu málaflokksins á Akranesi. Í því samandi ræddi Sævar þá vinnu sem starfshópur skipaður fulltrúum Akraneskaupstaðar og ÍA hefur unnið á liðnum vetri um fjárhagsstuðning Akraneskaupstaðar til handa ÍA. Sævar sagðist  að niðurstaða þeirrar vinnu myndi liggja fyrir innan skamms. 

Forsvarsmenn nokkurra íþróttafélaga tóku einnig til máls um ýmis málefni sem tengjast íþróttahreyfingunni en almennt voru fundarmenn bjartsýnir á framhaldið núna þegar sér til sólar eftir erfiðan vetur.